ප්‍රශ්න වලට බිය නොවන්න

සිතට වදදෙන ඕනෑම ප්‍රශ්නයක් විසඳා ගැනීමට මාර්ගයක් ඇත. චේතනාව කර්මය බව අදහන ඔබ පළමුකොට ඔබේ ප්‍රශ්නයට විසඳුමක් ඇතැයි යන බලවත් චේතනාවක් ඇති කරගත යුතුය.

සමහරු තමන්ගේ ප්‍රශ්නය සම්පූර්ණයෙන් විසඳී යනවාට කැමති නැත. පීනස සුව වුවහොත් රෑ වැඩ කරන්නට සිදුවේ යයි සිතන අයෙකුගේ පීනස සුව වෙන්නේ බාගෙටය. රක්ෂාවක් ලැබුනොත් දුෂ්කර පළාතකට යන්නට සිදුවේ යයි සිතන පුද්ගලයා තමාගේ රැකියා ප්‍රශ්නය විසඳෙනවාට අකමැතියි.

ඉතා සුළු වෙළඳාමක් ඇරඹීමට සූදානම් නැති පුද්ගලයා ඉතා විශාල ව්‍යාපාරයක් ඇරඹීමට බාධාවක් ඇතිකර ගන්නෙකි. තමාගේ ප්‍රශ්නය විසඳා ගන්නට තමා කිසිදු වෑයමක් නොකරන පුද්ගලයා අනුන්ගේ අනුකම්පාව බලාපොරොත්තු වෙන යාචකයෙකි.

කෙනෙක් නිතරම තමන්ගේ දුක් ගැනවිල්ල ගැන පමණක් කිය කියා සිටින්නේ අනුන්ගේ අනුකම්පාව ලැබීමේ ආශාව නිසාය. දුකින් මිදීමට බලවත් ඕනෑකමක් ඇති තැනැත්තා දුක කිය කියා නිකන් ඉන්නේ නැත.

ඔබේ දුක් කරදරයෙන් ජයගන්නවා යයි ඔබ දැඩි අධිෂ්ඨානයක් කළ සැනින් ඔබේ යටි සිත ඔබව එම ජයග්‍රහණය දක්වා ගෙනයෑමට සූදානම් වෙයි. අදිටන වෙනස් කළ සැනින් යටිසිතේ සූදානම් වීම ද අත්හැරේ.

අවංක සිතින් ඔබේ මානසික අසහනයට හේතුව සොයා බැලීමට මොහොතක් වෙන් කරන්න. එම හේතුව සෙවීම කළ යුත්තේ සත්‍යවාදී, මධ්‍යස්ථ මත දරණ අවංක හා සේවයට කැපවූ රහස් පරීක්ෂකයෙකු රහසක් අනාවරණය කරගන්නට වෑයම් කරන ආකාරයෙනි.

ඔබේ දුක් කරදරය ඔබේ වාසියට හා අවාසියට විසඳන හැටි මනසින් බලන්න. නඩුකාරයෙකු ඉදිරියේ කරන නඩු විභාගයක් මෙන් එය මනස නමැති විනිශ්චය ශාලාව තුල විභාග කර බලන්න. එම රහසිගතව ඔබම කරන විභාගයේ දී ඔබ වරදකරුවා වුවත් නිවරදකරුවා වුවත් ඔබට ගැලවීමක් ඇත.

ඔබට හිරිහැර කරන ප්‍රශ්නය මිල මුදල් හිඟය නම් එයට හේතුව ඔබ ළඟම ඇත. ඔබ සමාජ ඇසුර සීමා කරගෙන සිටින්නෙකි. මිනිසුන් ප්‍රිය කිරීම යනු ධනය ප්‍රිය කිරීමයි. එක් අයෙකු හෝ පිළිකුල් කරනවා නම් එම පිළිකුල (ද්වේෂය) ඔබ කරා ධනය ගලා ඒමට හරස් වන බාධකයකි. ඔබේ ස්වයං යෝජනාවට එවිට අංශ භාගය වැළඳී ඇත.

සත්‍යය අවබෝධය සහ දැනුම ඔබේ සිත තුලට එකවර ගලා එන්නේ නැත. කොටස් වශයෙන් වරින් වර සිත තුලට ගලා එන විසඳුම් ගැන විමසිලිමත් වන්න.

කුමන හේතුවක් හෝ නිසා ඔබේ ප්‍රශ්නයට විසඳුමක් නැතැයි නොසිතන්න. විසඳුමක් ගැන සිතනවා මිස දුක් කරදරයට තව තවත් බලය දීම සඳහා ඒ ගැනම සිතන්න එපා. ප්‍රශ්නය සිතා ගන්නට බැරි තරම් අවුල් සහගත නම් එවැනිම ප්‍රශ්නයක් ඇති හිතවෙතෙකුට ඔබ දෙන උපදෙස කුමක් ද? අන්න ඒ විදයට ඔබේ ප්‍රශ්නය අන් කෙනෙකුගේ ප්‍රශ්නයක් හැටියට සිතන්න.

ප්‍රශ්න විසඳීම පසුවට කල් දමන්න එපා. අද විසඳීමට බැරි නම් හැකි තරම් දුරට විසඳා ඉතිරි හරිය පමණක් කල් දමන්න.

ප්‍රශ්න යටපත් කිරීම යනු විසඳීම නොවේ.

ප්‍රශ්න හා අසහන වැඩි වූ විට මත්පැන් හා මත්ද්‍රව්‍ය ගැනීමට පෙළඹේ. එවිට තවත් අලුත් ප්‍රශ්නයක් එකතු වෙයි.

ජීවත්වීම යනු එදිනෙදා පැන නඟින ප්‍රශ්න විසඳීමය. එයට බිය නැතිව මුහුණ දෙන්න.

පසුබට වන ගතිය දියුණුවට බාධාවකි.

ඇතැම් දෙමාපියන් ප්‍රශ්න නොවිසඳා මිය යති. ඔවුන්ගේ දරුවන්ට හා දරුවන්ගේ දරුවන්ටත් ඒ නිසා ඇතැම් ප්‍රශ්න විසඳා ගන්නට බැරිවේ.

ඔබේ ප්‍රශ්නයට විසඳුමක් ඇති බව නිතරම සිතන්න. එවිට ඒ විසඳුම සොයා ගැනීම ඔබ අතින් ඉක්මනින් සිද්ධ වේ.

-සුමනදාස සමරසිංහ, 1979 මැයි 1, චිත්ත ධර්ම විද්‍යා පත්‍රය

බොළඳ සිත්

  • අනුන්ට රිදෙන විදියේ යටි උගුලක් ඇද සියුම් සතුටක් ලබා ගැනීම
  • තමන්ගේ ‘අගය’ අනුන්ට පෙන්වීමට මඟුල්තුලා ආදියට නොයෑම
  • තම අහංකාරකම, මානය, බොරු සෝබනය, උද්ධච්චකම තමන්ට තේරුම්ගත නොහැකිවීම
  • අනුන්ගේ පහනෙන් එළිය බලමින් කෙළෙහිගුණ නොසැලකීම
  • අන් කෙනෙකුට විඳින්නට සිදුවන යම් හිරිහැරයක් ගැන තමන් සතුටට පත්වීම
  • ඇසුරු කරන අය සතුටු සිතින් ඉන්නවා දැකීම නුරුස්සන ස්වභාවය

-සුමනදාස සමරසිංහ, 1979 මාර්තු 1, චිත්ත ධර්ම විද්‍යා පත්‍රය

මෙය අත්හදා බලන්න

අද දවසේ ඔබේ සිත කරුණාවෙන් හා දයාවෙන් පුරවා ගන්න. එසේ පුරවා ගත් දේ ඔබට හමුවන සෑම කෙනෙකුටම බෙදන්න.

අනුන්ට කරුණාව දයාව දීමට නම් ඒවා තමන් වෙත තිබිය යුතුයි. තමන් ළඟ නැති දෙයක් අනුන්ට දීමට හැකිවන්නේ කෙසේද? අනුන්ට කරුණාව දයාව පතුරුවා හරින්නට වෑයම් කරන බොහෝ දෙනා එම උතුම් ගතිගුණ පළමු කොට තමන් ළඟ ඇති කරගත යුතු බව නොදනිති.

එදිනෙදා ජීවිතයේ දී කරුණාව හා දයාව පැතිරවීමට පුරුදු වන අයට ඉතා පුදුම අන්දමින් දියුණුවක් ඇතිවේ. කරුණාවට හා දයාවට අකමැති අයෙකු නැත. ඕනෑම කෙනෙක්, ඕනෑම සතෙක් කරුණාව හා දයාව වහා හඳුනා ගනියි. ඇතැම් කුරිරු තිරිසන් සතුන් කරුණාව පෙන්වීම නිසා හීලෑ වෙති. මුල දී උන්ට නුපුරුදු නිසා කරුණාවන්තකම හඳුනා නොගත්තත්, නිතර නිතර කරුණාවන්තවීම නිසා උන් සංසුන් වෙති. කරුණාවන්ත මනුෂ්‍යයා කාහටත් ප්‍රිය කෙනෙකි. ඔහු කිසිවෙකුට ගරහන්නේ නැත.

ඇතැම් විට කෙනෙක් සමාජයේ යහපත පිණිස යයි කියමින් කෙනෙකුට ගරහයි. එය කරුණාවන්ත භාවය බව පෙන්වීමට ද එම පුද්ගලයා වෑයම් කරයි. එහෙත් සැබෑ කරුණාවන්තකම නම් සමාජයට අහිතකර අපරාධ කරන පුද්ගලයාට පවා කරුණාව දයාව දැක්වීමයි. ඔහු හොඳ ගුණ යහපත් පුද්ගලයෙකු වන්නේ එවිටයි.

වරද කරන, නරක හා දුෂ්ඨ පුද්ගලයෙකුට තව තවත් දරදඬුකම් පෙන්වුවහොත් එම පුද්ගලයා තව තවත් පෝරිසාදකම් කිරීමට පෙළඹේ. ගින්නක් නිවීමට ජලය ඉසිය යුතුයි. ගින්නට තව තවත් ගිනි ඉසීමෙන් ගින්නක් නිවී යන්නේ නැත.

මේ බව නොදන්නාකමින් බොහෝ දෙනා ද්වේශ කරන අයට ද්වේශ කරති. ඉරිසියා කරන අයට ඉරිසියා කරති. එකට එක කිරීමට යෑමෙන් අවුලක් වියවුලක් බවට පරිවර්තනය වනවා මිස නිරවුල් වන්නේ නැත.

ඔබට ඉරිසියා කරන අයට ඔබ සමාව දිය යුතුය. ඔබට වරද කරන අයට ඔබ සමාව දිය යුතුය. එහෙත් ඔබේ කකුලේ ඇනුණ කටුවක් මෙන් ඔබ දෙන සමාව පිළිනොගෙන ඔබට තව දුරටත් රිදවනවා නම් එහි දී ඔබ ඇනුනු කටුව ගලවා ඉවතට ඇද දැමිය යුතුය. ඔබේ සමාව දෙන සිතින් එම පුද්ගලයාට සමාව දී ඔහු ගැන සිතීම සිතින් ඉවත් කරන්න.

හිරිහැර බාධා කරන අය ගැන නිතර සිතන්නට යන්නට එපා. ඔවුන් ගැන සිතන විට ඔවුන්ගේ බලය තවත් වර්ධනය වේ.

චිත්ත ධර්ම විද්‍යාව යනු කිසිදු ආගම් භේදයකින් කිළිටි නොවන උත්තරීතර ධර්මයක්. එය සියළු විද්‍යාවන්ට එකඟය. එය සියළු ආගම් වලට එකඟය. ස්වභාව ධර්මයා හොඳ මිනිසුන්ට මෙන්ම නරක මිනිසුන්ට ද ස්වකීය ආශීර්වාදය ළඟා කර දෙති. එමෙන්ම චිත්ත ධර්ම විද්‍යා ඉගැන්වීම් වලින් පවසනු ලබන්නේ කුමන විදියේ හෝ භේද වීම් වලින් තොර සමගියකි. සිත ආරක්ෂා කරගැනීමට උගන්වන නවීනතම ඉගැන්වීම චිත්ත ධර්ම විද්‍යාවයි.

ස්වභාව ධර්මයේ ආශීර්වාදයන් වන අව්ව, වැස්ස, සුළඟ පොදුවේ කා හටත් එක සමානව ලැබේ. නරක කරන අයට හෝ හොඳ කරන අයට කියා ඒවා සීමා වෙන්නේ නැත. මේ අයුරින් අපේ කරුණාව හා මෛත්‍රිය කාහටත් පොදුවේ දැක්විය යුතුය. එක් කරුණාවන්ත වචනයකින් කෙනෙකුගේ ජීවිතයේ විශාල වෙනසක් කරන්නට හැකිවනු ඇත. එසේම එක් සැඬ පරුෂ වචනයකින් කෙනෙකුගේ වටිනා ජීවිතයක් අනාථවීමට වුවද ඉඩ තිබේ.

කරුණාවන්ත වීමට ඔබට කිසිම මුදලක් වැය වන්නේ නැත. ඔබට කිසිදු වෙහෙසක් දැනෙන්නේ ද නැත. එහෙත් අද පටන් වෙනදාට වඩා සුළු ප්‍රමාණයකින් හෝ කරුණාවන්ත වී බලන්න. ඔබ මෙතෙක් නොදුටු විස්මිත ලෝකයක් ඔබ අත්දකිනු ඇත. ඔබේ කරුණාවන්තකම ඔබ ඇසුරු කරන අය අතර සීඝ්‍රයෙන් බෝ වී යන අයුරු ඔබට ද දැක බලා ගත හැකිය. ඔබ මෙතෙක් අනුන් ගෙන් නොලත් සහයෝගයක් ඔබ වෙත ගලා එන බව ඔබට අත් දකින්නට ලැබේ.

කරුණාව දයාව නොහඳුනන අයට එය හඳුන්වා දීමට ඔබ පුරෝගාමියෙකු වන්න. ඒ සඳහා කළ යුත්තේ පළමු කොට ඔබ කරුණාබර හදවතක් ඇති අයෙකු වීමයි.

ඔබ සමාජය වෙනුවෙන් යම්කිසි සේවයක් කිරීමට බලාපොරොත්තුවෙන් සිටින කෙනෙක් ද?

එසේනම් ඔබට ඒ සඳහා මෙන්න කදිම අවස්ථාවක්. ඔබ කළ යුත්තේ ඔබ ජීවත්වන මුළු සමාජයටම වචනයෙන් හා ක්‍රියාවෙන් දයාව කරුණාව හඳුන්වා දීමයි. මෙය ඔබේ ජීවිතයේ එකම පරමාර්ථය වුවත් කම් නැත. ඒ මන්ද යත් ඒ එකම ක්‍රියාවෙන් පවා ලෝකයාට සැනසීමක් ලැබෙන බැවිනි.

ඔබට සාමය, සතුට, සම්පත උදාවේවා!

-සුමනදාස සමරසිංහ, 1980 සැප්තැම්බර් 15 වැනිදා චිත්ත ධර්ම විද්‍යා පත්‍රය