ලොක්කන්ට ආරූඪ වෙන්න පුළුවන් භූතයෙකු ඕනෑ!

මහජනතාවගේ පින්පෙත් ලබන තිස්තුන් කෝටියක් දෙවිවරුනි! රටපුරා අහිංසක මෝඩ කාන්තාවන්ට හා බුද්ධි හීන පිරිමින්ට වැහෙන භුතයනි! අපේ පාලක පක්ෂයකට ආරූඪ වී රටේ දියුණුවට පේන කියා නොපෙනෙන ධන සම්පත් ඛණිජ තෙල් උල්පත් මතුකර දීමට ඉදිරිපත් වන්න. එයට කාලය දැන් පැමිණ ඇත.

සාමාන්‍ය මිනිසුන්ට වඩා දුර පෙනෙන දිවැස් ඇති දෙවිවරුනි! අපි දෙන පින්පෙත් ලබමින් අප ගැන නොසලකා සිටීම වැරදි බව දැන්වත් තේරුම් ගන්න. දෙවියන් වන ඔබ වහන්සේලා මනුෂ්‍යයන්ට වඩා උත්තම වූ අය විය යුතුය. එම නිසා සිල්වත් කමක් නැති, හරි ඉගෙනීමක් නැති, බුද්ධියක් නොමැති අහිංසක මෝඩයෙකු තෝරාගෙන ඔහුට ආවේශ වීම නතර කරන්න.

මෝඩ මිනිසෙකුට ආරූඪ වී ඔහු ලවා පේන කියනවා වෙනුවට, ඔහු ලවා වැරදි කරුවන්ට දඬුවම් දීම වෙනුවට, නැතිවුනු හරකුන් සොයා දීමට සහාය වෙනවා වෙනුවට, අපි දෙන පින් අරගෙන අපේ රටට යහපතක් වන පරිදි ඛනිජ සම්පත් ඇති තැන් සොයා දෙන්න.

ඔබ වහන්සේලාට පින් නොදෙන පිටරටවල මිනිසුන්ට හැම සම්පතක්ම ලබා දී ඒ පිටරැටියන් ගෙන් අපට අවශ්‍ය කෑම ටික පවා හිඟා ගැනීමට සැලැස්වීම දැන්වත් නතර කරන්න. දෙවියන් වුවත් සාධාරණ යුක්ති ගරුක අය විය යුතුය. පින් දෙන අපටම කරදර ලෙඩ දුක් දී හිඟමනට පත් කිරීම හා පින් නොදෙන පිටරැටියන්ට හැම සම්පතක්ම දීම කුමන දේව ධර්මයක් ද?

පෙර ජාතිය හා මී ළඟ ජාතිය අපිට කියා දෙමින් කාලය නාස්ති කරනවාට වඩා මේ දැන් අපි ඉපදී සිටින ජාතිය දියුණු කරගැනීමට අපට උපදෙස් දෙන්න.

භූතයින් ලෙසින් තවමත් අපේ කුඩා දිවයිනටම කොන් වී සිටින යකුනි! ප්‍රේතයිනි! වැරදි කරන අපරාධ කරන එකම පුද්ගලයෙකුට හෝ තොපි තවම වැහී නැත. භූතයෝ වන තොපි වැහෙන්නේත් අසරණ මෝඩ මන්ද බුද්ධික ගැහැණු පරාණයකටමයි.

ගෙවල් වලට ගල් ගැසීම, මුට්ටි පෙරලීම හා බාල්දි පෙරලීම හැර භූතයන් වන තොපට වෙන වැඩක් නැද්ද?

-සුමනදාස සමරසිංහ, චිත්ත ධර්ම විද්‍යා පත්‍රය, 1978 මාර්තු 15

Advertisements

2 comments on “ලොක්කන්ට ආරූඪ වෙන්න පුළුවන් භූතයෙකු ඕනෑ!

  1. Jagath says:

    අනිවා නියම කතාව. මේක ඇහුවම දෙවියොයි පෙරේතයොයි රෙද්ද උස්සන දුවයි

  2. manoj edirisinghe says:

    great thanks

Comments are closed.