නැති බැරිකම රෝගයක් ද?

නැති බැරිකම මානසික රෝග ලක්ෂණයක් යයි ඔබ පිළිගන්නේ නැත. එහෙත් කෙනෙකු නැතිබැරි දුගියෙකු වී සිටින හේතුව සොයා බැලුවා නම් එයට මුල් වූ මානසික රෝග ඔබට වහා තේරුම්ගත හැකිය.

සිතේ උදාසීන භාවය යනු සිත රෝගී වීමකි. සිත අලස වන්නේ සිතට හා ගතට වැළඳෙන ආබාධයක් නිසාය. ඉරිසියාව බලවත් මානසික රෝගයකි. දියුණු වී සිටින අයට ඉරිසියා කරන්නේ තමන්ගේ රෝගී මනසිනි.

වනචාරී යුගයේ ජීවත් වූ වැදි තරුණයා දුනු ඊතල සොයා නොගෙන දඩයමේ නොගොස් සිටියා නම් එකල සමාජයේ හැටියට ඔහුට බිරිඳක් හෝ වැඩිහිටි සැලකිල්ලක් නොලැබුණි.

රැකියා පුහුණුව එදා මෙන්ම අදත් අවශ්‍ය වේ. රැකියාවක් කිරීමට නොදන්නාකම මෝඩකම නොවේ. අලසකම ද නොවේ. එය අහංකාර මැලිකමකි. මේසන් වැඩ, වඩුවැඩ හා කාර්මික වැඩ පහත් වැඩ හැටියට සලකන්නේ බොරු උඩඟුකමෙන් මත් වූ අයයි.

තමා ජීවත්වන කාලයේ හැටියට තමන්ටය කියා ගෙයක්, වාහනයක් හා ස්ථිර ආදායම් මාර්ගයක් නොමැති වීම හා ඒවා ලබා ගැනීමට උත්සුක නොවීම මානසික රෝගීකමේ ලක්ෂණයකි. විප්ලව කිරීමට මිස ශ්‍රමය වැය කොට දියුණුවක් ලැබීමට අකමැතිවීම ද මානසික රෝගයකි.

බොහෝ තිරිසන් සතුන් මිනිසා පහළවීමට කලින් පහළ වී මිනිසා සමඟ තම පැවැත්ම අඛණ්ඩව ගෙන ගියේ උන්ගේ ආහාර හා නිවාස ප්‍රශ්න විසඳා ගැනීමෙනි. දියුණු කළ හැකි මොළයක් නැතත් තම වර්ගයා බෝ කිරීම හා පණ රැකගෙන ජීවත්වීමේ හැකියාව අදත් ඔවුනට ඇත. දියුණු කළ හැකි විශේෂ මොළයක් ඇති මිනිසා පමණක් ආහාර හා නිවාස ප්‍රශ්න මතුකරගෙන ජීවත්වීම ලෝක ගැටළුවක් කරගෙන සිටී.

වඩුකරුල්ලා අලංකාර නිවහනක් ඉදිකර ගැනීමට නැකත් බැලුවේ නැත. අන් අයගේ උපකාර හෝ විශේෂ ඉගෙනීමක් ලැබුවේ ද නැත. කුඹලා මැටියෙන් ගෙයක් තනා ඒ තුල බිත්තර දමයි. ඉන්පසු දලබුවෙකු ඒ තුලට දමා මැටිගෙය වසා දමනු ලැබේ. දලබුවා නොමැරී පැටවුන්ට ආහාරයක් වීම සඳහා තැබීමට ඌ දලබුවාගේ හිසට දෂ්ට කොට උගේ සිහි නැති කරවයි. මේවා කිරීමට කුඹලා කේන්දර බැලීමක් හෝ නැකැත් ගැනීමක් නැත.

තිරිසන් සතුන්ට නැති බලයක් හා විවිධ උපාය මාර්ගයන් සමඟ බලවත් මොළයක් මිනිසාට ඇත. ඔහුගේ ප්‍රශ්න ඔහුට විසඳා ගැනීමට බැරි ඒවා නොවේ. මිථ්‍යාව, ඉරිසියාව, අහංකාරකම ආදි දහසක් මානසික රෝග නිසා ඔහු අබල දුබල වී සිටිනු දක්නට පුළුවන.

රෝග බව නොපෙනෙන බොහෝ රෝග තිබේ. නැති බැරිකම හෝ අගහිඟකම එවැනි රෝගයක ප්‍රතිඵලයකි.

-සුමනදාස සමරසිංහ, චිත්ත ධර්ම විද්‍යා පත්‍රය, 1983 ඔක්තෝබර් 1

Advertisements

පෞරුෂත්වය පුද්ගලයා වාසනාවන්තයෙකු කරයි

සංසුන් නමුත් කාර්යශීලී කෙනෙකු මෙන් පෙනී සිටීම ධනවත්වීමට අතිශයින් වැදගත්ය. අලසයෙකු, මෝඩයෙකු, තුෂ්නිම්භූත වූ අයෙකු නැත්නම් නිතරම කඩි කුලප්පුව හැදුනු කෙනෙක් ලෙස හැසිරෙන පුද්ගලයා ධනවත් කෝටිපතියෙකුගේ ලක්ෂණ පිළිබිඹු කරන්නේ නැත. ඔබ සංසුන් ගති ඇති අයෙක් ද?

කෙනෙකුගේ පෞරුෂය එම පුද්ගලයා වාසනාවන්තයෙකු කරයි. සමහරු මෙය වරදවා තේරුම් ගනිති. එනම් ලොකු වැදගත් පෙනුමක් තිබු පමණින් හොඳ පෞරුෂයක් ඇතැයි සිතීමය. හොඳ පෞරුෂයක් සඳහා වැදගත් පෙනුමක් මෙන්ම උසස් මානුෂික ගතිගුණ ද තිබිය යුතුය.

මිතුරන්ට ද්‍රෝහී විම, අනුන්ගේ පහනින් එළිය බැලීම හා තමන් නොදන්නා විෂයයක එල්ලී කටයුතු කිරීම ඕනෑම කෙනෙකුගේ කීර්තියට හානි කරයි. එසේ කීර්තියට කැළල් ඇති වූ විට හොඳ නමට වඩා නරක නාමය වහා පැතිරී යන නීතිය යටතේ එම පුද්ගලයා වැඩි දෙනෙකුගේ පිළිකුලට භාජනය වන්නේය. උසස් රැකියාවකට කෙනෙකු තෝරා ගැනීමට පෙර ඔහුගේ පසුබිම සොයා බලනු ලැබේ. කලින් ණය තුරුස් වී සිටීම හා මිල මුදල් වංචා කර තිබීම නිසා උසස් පදවි අහිමිවන අය බොහෝය. කෙනෙකු පිළිබඳ සැබෑ තත්වය දැන ගැනීම සඳහා ඔහු ඇසුරු කළ අයගෙන් විමසා බැලීම සමාජයේ සිරිතකි.

අසවලා අසවල් වෙළඳ සමාගමෙන් අස් කළේ ඇයි? ඔහු අසවල් අය සමඟ දැන් අමනාප ව සිටින්නේ මන්ද? මේ විදියට කෙනෙකු ඔබ ගැන විපරම් කරන විට කුමක් කියවේ ද? නරකක් කියවේ නම් එය ඔබේ ධනවත්වීමට බාධාවක් බව සලකන්න. නිතරම ඔබට එවැනි බාධාවන් ඉවත්කර ගැනීමට පුළුවන. ඒ සඳහා විශේෂ ඥානයක් හෝ උපදෙසක් අවශ්‍ය නොවේ. කළ යුත්තේ වැරදි හරිගස්සා ගැනීම පමණය.

කෝටිපතියෙක් ලෙස සිතන්නේ නැතිව ඔබට කෝටිපතියෙකු වීමට බැරිය. කෝටිපතියෙක් ලෙස නොසිතන උගතා නිතරම උගත් දුප්පතෙකි. පණ්ඩිතයා නුවණින් වැඩි දුප්පතෙකි. ගුරුවරයා අනුන්ට සිප් සතර දෙන නමුත් තමන්ගේ අතමිට හිඟ කමින් පෙළෙන්නෙකි.

ලද දෙයින් සතුටු වීම යන රුවන් වැකිය අලසයා විසින් තමන්ගේ වාසියට හරවා ගෙන තිබේ. යම් කෙනෙකු වසර තුනකට වඩා කාලයක් රැකියාවෙන් උසස්වීමක් නොලබන්නේ නම් ඔහු කරන රැකියාවට ආදරයක් නොදක්වන්නෙකි. උසස්වීමක් ලබන පුද්ගලයා අලස හා කළකිරුණු පුද්ගලයෙකු නොවේ.

ධනවත්වීමට ඕනෑ කරන පුද්ගලයා ජීවත්විය යුත්තේ නිදහස් සිතකිනි. කුලමල, කෝන්තර, ණය තුරුස්, නැති බැරිකම්, පලිගැනීම් වැනි චේතනා ඉස්මතු කරගෙන සිටිය දී ධනවත්වීමේ චේතනාවට මතුවිය නොහැකි බව මතක තබාගන්න. ඔබ බිරිඳගේ දේපල වලින් හා නෑයන් ගෙන් යැපෙන්නෙක් නම් එයින් ද නිදහස් වීමට සිතන්න. අනුන්ගෙන් යැපෙන්නෙකු විමේ ආශාව අත්හරින්න. දියුණුවීමේ මුල්ගල එයම වන්නේය.

-සුමනදාස සමරසිංහ, චිත්ත ධර්ම විද්‍යා පත්‍රය, 1978 අගෝස්තු 1